|
Die Sonntagspaddler. (Dessauer Mundart)
aus “Lustijes aus unse Heimat” von Karlchen-Dessau
De Sunntahkspaddlor.
An de Fähreschwemme schiemn Fritze un Arno ihrn sellewor jebauten Kahn in de Mulde. Fritze kuhkt uff seine joldne Uhr un saht: „Nu los, meine Braut wartet ans Jeschtänge, se will sähn, wiemor ankommn.“
Se paddeln ab, de Mulde ruff durch de Bricke. ’S is Schitznfest, anne Velkorwanderunk ungorwäjns. Iwwors Jeschtänge piljorn ooch de Leite mit Kind un Kejel na’n Rummelplatz, Lieschn mittnmank. Jetzt hatses Boot jesähn.
„Huhu - - h Fritzchn.“ Se winkt mits lanjetierte Schnupptuch. De Leite bleimn schtehn. An kleenor Junge saht: “Vator, kuhke ma, an feinor Kahn.“
Jimnasiaste: „Schneidijes Boot, liecht fawelhaft.“
Eenor mit de Latjormitze meent zu sein’n Kumpel: „Was der Lackaffe vorschteht von schneidijes Boot. Die wolln sich nurt was zeijn mit ihrn Äppelkahn.“
Fritze zu Arnon: „Wir fahrn ma weitor ran, Du mußt vorne uffpassn, dasses Wasser nich uff de Schpitze fällt.“ „Mensch, sick nich so iwwormietich, ich hawwe mein’n neien Anzuch an.“
Se paddeln dichte ans Jeschtänge, ’s Boot huppt un schunkelt uff de Welln.
Ahlor Harre: „Leichtsinnijes Volk.“
Lieschn ruft: „Kuhkt ma hohk, ich knipse.“ Se schtellt de Entfarnunk in.
Fritze un Arno schmeißn sich in de Brust un kuhkn na’n Fottejrafnkastn. ’S Boot treiwet ran.
Da - - psch - - - - sch! Dor Wassorfall drickt vorne uff de Schpitze, dor Kahn macht anne Vorbeijunk, de Paddlor plumpsn in de Mulde.
Lieschn kreischt, se knipst ins Blaue.
Kleenor Junge: „Vator, da wern sich awwor de Aale frein uff sonne fettn Happn.“
Jelächter un Ween’n. De Kumpels johln: „Scheen’n Jruß an de Fische!“
Altor Harre: „Roheit, auch noch Lachn, holnse liewor Hilfe.“
„Mein armor Fritze, mein armor Fritze, helfense doche!“
Lieschn weent jottsarbarmlich. Eenor von de Kumpels kloppt se uff de Schullor: „Ween’n se mant niche, Freilein, die kommn alleene weddor hohk, Fett schwimmt omn.“
Dorweile isses Boot abjesackt. De Paddel treimn na’s annorte Ufor, wu Fritze mit Arnon ufftaucht. Se krawweln aus de Mulde wie an paar Fräsche.
Dor kleene Junge: „Freilein, jetzt kennse knipsen, Ihr Scheeks is weddor da!“
Klatsch! Dor Vator jiwwet sein’n Schprößlink eens uff de Lawwe: „Naseweisor Limmel.“
„Huä - - - - äh.“
De Leite jehn weitor, alle is de Wassorpantemieme. Nurt de beedn Kumpels bleimn schtehn, dor eene saht: „Paule, da kemmor an Jeschäft machn, paß uff.“ -
Fritze und Arno lähn ans Ufor mank de Weidn un laßn ihre Sachn trockn’n. Lieschn kimmt. „Sähtor woll, warum fahrtor so weit ran, das is nu mein Schitzenfest!“
De Trän’n kollorn. Fritze treestet: „Warte nurt, meine Kleene, wenn’s dunkel is, jehn mir niwwor un fahrn Karresell.“ Er läht sein’n Arm um Lieschn ihrte Tallje. Arno haut ab, hä will nicht schteern. –
Acht Jahre druff hann de Kumpels mit Ach und Krach ’n arsoffn’n Kahn aus de Mulde jetreckt. Fritze buzahlte jarne de Barjunkskostn un de beedn Arweetslosn hann sich jefreit. (Ebbse ’n Nämnvordienst anjejähmn hann?)
|
 "LogoPk")
